小羊日誌
2月24日 (Monday) 天陰陰的日子
今日沒有什麼好事發生,不過亦好在沒有什麼不幸事發生,可喜可賀~hee
上星期去左好好運葡國燒烤食呢個承惠$88再加一免費任飲任食自在餐,價錢唔貴,野食都ok,尤其是燒豬肋骨+燒羊脾+燒辣魷魚+ 燒乳豬絕對係must eat item~~~不過又真係好鬼死熱氣,好在有得狂飲茅根竹蔗水調和調和~最緊要讚一讚d service,唔錯唔錯!!!
4月4日 (Thursday) 兒童節呀兒童節~
兒童節麥當當有雪糕送，細路仔認真開心開心~如果我重係12歲以下你話幾好呢?!
今日與同事B出街食飯認真黑仔，先是開茶時俾粗魯waitress大聲回應"我咪問緊你飲咩茶囉~"，跟住叫咗個set二十分鐘後，waitress又走黎話賣晒無呢樣無嗰樣，咁賣晒使唔使check成20分鐘呀？!最後唯有散叫囉，咁都要得到個漏單催等人催三催四先安樂嘅。我諗我都唔會幫襯呢間"紅丁海鮮酒家"勒~。
特別報告：今日11:15pm在尖咀某vcd舖入貨兩隻----> 終極天險，女人那話兒
4月3日 (Wednesday) 勁曬勁曬勁曬~
不經不覺又到星期三，返埋聽日又到萬眾歡騰放假大日子(估唔到清明節都可以咁萬眾歡騰喎~)。
今日8:30pm睇到"獅子山下"，果真係經典重現呀~起碼見到少女版許鞍華+後生瘦版吳孟達已經回本啦，不過講真劇情幾得架。
今日斥巨資300大蚊帶Pizza狗去美容，查實係剃晒啲毛至真，點睇都唔覺得有幾"美"?!只可以話轉image，由傻版長毛狗變身liu瘦版史納"羊"。
3月28日 (Thursday) 毛毛雨兼復活節假期前夕
近排買佐幾隻CD---->Swing Swang Swung 絕唱， 林子祥&陳奕迅01拉闊兩大勁人大鬥法， 梅大姐+一大班歌手二人對唱，果真無fing錯錢，尤其林&陳(又尤其係阿LAM)，正!!!
近排屋企大L (我老豆，並非神童輝老死嗰個)唔知點解突然chit起條筋要買大陸樓，上個禮拜先陪佢遊歷東莞常平一帶風光，相信下個禮拜再要殺埋去廣州番禺先得喇。
2002年3月21日 (Thursday) 少少曬啦
呢排返工聽埋聽埋咁多壞消息，真係勁冇mood，算啦，都係呢句---->煮到埋黎咪食囉~
睇左"男人四十"，都記幾好喎，張學友做得幾好真係幾似四十歲架。不過，始終都係鐘意"女人四十"多啲，喬宏叔好野~
11月3日 (Saturday) 晨早起身精神好
昨天Mom生日但無幫佢慶祝，真慚愧! 今日梗係要補番數啦.....點知一起身以為9點好鬼早啦，第一時間衝入佢房，Mom竟然已經出佐去~~~唔係呀?!
9月4日 (Tuesday) 好在唔曬
今日晏晝去天水圍做野，齋搭車都用咗4粒幾鐘，真係人都呆~~~唔寫啦,要抖抖先~~(又有藉口懶喇!heehee)
9月3日 (Monday) 朝早超級勁大雨
嘩嘩嘩~~~今朝真係好大雨，啲學生仔就好喇，又有得放假嘞，真係超級羨慕呀~~~~
今日忙碌中嘅時候，竟然收到個意想不到超"騎呢"電話，原來係以前已執笠-ed嘅公司個cheap老細打嚟問有無興趣去佢間新出版公司幫手，心諗"唔係呀Fa，唔好咁益我啦掛，又想我去多一次勞工署莫非"(事緣就係呢份工搞到我第一次見證一間公司執笠，第一次上勞工署，第一次申請破產唔知乜鬼基金，好彩又俾我收到錢喎。話你知，呢啲經驗唔係人人有架，你有無呀？話時話，呢啲經驗查實都幾把鬼下架...哈哈)
呢幾晚都真係無覺好瞓，皆因依期唔知乜解救拎呀PP仔入房瞓。唔知佢係唔習慣定興奮得滯，成晚無時停，唔係上黎舔我，就跳來跳去發神經，搞到我都差啲發埋神經。(呢啲唔係叫攞黎賤叫乜?!)
9月2日 (Sunday) 天陰陰
今日睇番自己個網頁，真係好唔爭氣，竟然夠膽死成3個月都唔update，都唔知乜人黎架。算啦，由今日開始繼續寫番啲嘢先得。(聽住先啦...哈哈)
平日買埋買埋啲vcd成座山咁都仲未睇(加上平時懶得執同無手尾嘅關係，唔止成座山，直頭係垃圾堆填區咁)，尋日又買咗梅艷芳隻"慌心假期"，原本諗住都係麻麻地嘅遮，又唔差喎，劇情ok喎，不過擺係暑假就實死架遮。另外，又買咗史匹堡十世前隻"第三類接觸"，都唔知又要堆喺度幾耐喇......
P.S. 依期嘅減肥瘦身少食野計劃嚴重失敗，要盡快重整軍心再出擊先得!
5月25日(Friday)
終於寫完咗幾篇稿，可以抖番下啦。話明抖番下，就寫埋呢句算喇...heehee
5月24日(Thursday)
今日下晝又出去訪問（個被訪者又真係幾靚仔㗎！），所以可以早啲放工，好難得七點鐘就番到屋企架~~~
收到班納電話，佢話考試有一科communication Skills要resit喎，希望佢佢考得好啲啦。下個禮拜二佢就飛番黎放假喇，好開心可以見佢（同份手信...哈哈）。
今日真係聽咗好多好多次”玉蝴蝶”，但係又真係好鬼正！
5月23日(Wednesday)
今日原本諗住去上日文course嘅，點知下晝突然收到個電話，話要延遲到下個禮拜喎，點解呢？真係講出黎都好搞笑，就係話銅鑼灣懷疑發現有炸彈，附近都封鎖晒...唉~~~
今日買咗謝霆鋒隻cd，宜家聽緊，不過"玉蝴蝶"啲詞真係填得好正，比人一種詩嘅感覺，加上用字亦好靚，"戀生花也是你，風之紗也是你"。
5月22日(Tuesday)
今日去銅鑼灣間美容中心做訪問，都算幾順利啦，識咗兩個photog哥哥都幾好人㗎。之後約阿kit出黎，真係唔好意思要佢等咁耐，哈哈~~聽完佢講，宜家同番polly一齊，咁咪幾好，晤好諗咁多野喇。唉~~~又爭你兩餐飯喇，下次一定請番你嘅，放心!...:P
5月21日(Monday)
放工嘅時候竟然落雨，去到中環仲出現黃色暴雨警告添，最閉就係朝早懶醒無拿拿將袋裡面把遮拎咗出黎，唉~~~但係喺咁嘅情況之下，我都仲去到買何韻詩隻碟，六十幾蚊啫，都ok嘅，等一陣臨瞓前聽下先。見到櫃裡面咁多隻vcd都未睇，唔知幾時先有mood睇喇......
5月20日(Sunday)
今日約咗哥利亞，愛美莉同埋小丁去沙田。諗住去無印掃貨啦，點知我哋未去掃就先俾人哋掃晒，成個場就好似戰後餘生咁，乜都無得淨，把鬼!無計啦，去到咁鬼遠，點都要買番啲"手信"嘅，咪大拿拿淨係買咗個卡片盒同罐士多啤利汁咁大把。同佢哋無見成3個月喇，哥利亞帶咗部寶麗萊出黎，以為好易用啫，點知6幅裡面就影衰咗2幅，其餘1幅影到哥利亞得番半邊面，一幅就光得滯，另一幅就淨係影到小丁一個，真係勁正! (一日都係小丁啦~~~哈哈)
嘩~啱啱哥利亞打電話嚟話唔舒服，唔會關今日食啲雞事啩，咁驚？無事嘅!
5月19日(Saturday)
今日收到班納(我細佬，人稱"小猴")澳洲打番黎嘅電話，傾咗成粒鐘都係廿幾蚊，抵!啱啱先知原來佢喺嗰便養 咗隻貓仔(貓女先啱)，叫"豬扒"，希望佢唔好比人發現啦，因為係"貓蛇"黎嘅(宿舍唔比養㗎)。
Pizza仔(我狗狗，人稱PP, SaSa或傻瓜狗等等，正確黎講都係我改比佢嘅)今日真係超級懶，我咁辛苦幫佢剪毛，唔多謝我不特止，仲攤晒喺道掛住瞓，都唔知乜嘢狗黎嘅，唉~~~
5月18日(Friday)
開網日
登~~登~~~登~~~小羊網頁終於開幕啦~~~
今次係我第1次整homepage咋，所以都係好簡陋，實在唔好意思!...哈哈哈
今日番工等Shuttle Bus番將軍澳時真係等左超級耐，(聽聞講係撞車喎)，多人一齊等又唔怕遲到喇(當時梗係一齊嘩嘩聲話有無搞錯呀咁遲咁啦)，其實心裡面諗慢慢等唔使做嘢住咪重好!!!...:P
